Последование братского молебна

Свящ: Благословен Бог наш, всегда ныне и присно и во веки веков.

Хор: Аминь.

Диакон: Слава Тебе, Боже наш, слава Тебе.

Хор: Царю Небесный, Утешителю, Душе истины,и же везде Сый и вся исполняяй, Сокровище благих и жизни Подателю, прииди и вселися в ны и очисти ны от всякия скверны и спаси, Блаже, души наша.

И возглашает иеродиакон во глас 4-й:

Бог Господь и явися нам, благословен Грядый во имя Господне,

со стихи его:

1-й: Исповедайтеся Господеви, яко Благ, яко в век милость Его.

2-й: Обышедше обыдоша мя и именем Господним противляхся им.

3-й: Не умру, но жив буду, и повем дела Господня.

4-й: Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.

И тропарь глас 1:

Хор: От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.

Запев: Пресвятая Богородице, спаси нас.

Припев: Пресвятая Богородице, спаси нас.

Запев: Слава Отцу и Сыну и Святому Духу.

Припев: И ныне и присно и во веки веков. Аминь.(Все трижды)

Ектения малая

Диакон: Паки и паки миром Господу помолимся.

Хор: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Хор: Господи, помилуй.

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Хор: Тебе, Господи.

Иерей: Ты бо еси Царь мира и Спас душ наших, и Тебе славу возсылаем, Отцу, и Сыну, и Святому Духу, ныне и присно, и во веки веков.

Хор: Аминь.

Диакон: Вонмем. Премудрость. Вонмем. Прокимен, глас 4.

Помяну имя Твое во всяком роде и роде.

Хор: Помяну имя Твое во всяком роде и роде.

Диакон: Слыши, Дщи, и вюкдь, и приклони ухо Твое.

Хор: Помяну имя Твое во всяком роде и роде.

Диакон: Помяну имя Твое.

Хор: Во всяком роде и роде.

Диакон: Господу помолимся.

Хор: Господи, помилуй.

Свящ.: Яко свят еси. Боже наш, и во святых почиваеши и Тебе славу воссылаем Отцу и Сыну и Святому Духу, ныне и присно и во веки веков.

Хор: Аминь.

Диакон: Всякое дыханиеда хвалит Господа.

Хор: Всякое дыхание да хвалит Господа.

Диакон: Хвалите Бога во святых Его, хвалите Его во утверждение силы Его.

Хор: Всякое дыхание да хвалит Господа.

Диакон: Всякое дыхание.

Хор: Да хвалит Господа.

Диакон: И о сподобитися нам слышанию Святаго Евангелия Господа Бога молим.

Хор: Господи, помилуй (трижды).

Диакон: Премудрость, прости, услышим Святаго Евангелия:

Свящ.: Мир всем.

Хор: И духови твоему.

Свящ.: От Луки (от Иоанна) Святаго Евангелия чтение.

Хор: Слава Тебе, Господи, слава Тебе.

Диакон: Вонмем

Свящ.: Читает Св. Евангелие от Луки, зач. 4

«Во дни оны, воставши Мариам, иде в горняя со тщанием, во град Иудов: и вниде в дом Захарин, и целова Елисавет. И бысть яко услыша Елисавет целование Мариино, взыграся младенец во чреве Ея: и исполнися Духа Свята Елисавет. И возопи гласом велиим, и рече: благословенна Ты в женах, и благословен Плод черева Твоего. И откуду мне сие, да прииде Мати Господа моего ко мне; Се бо, яко бысть глас целования Твоего во ушию моею, взыграся младенец радощами во чреве моем. И блаженна веровавшая, яко будет совершение глаголанным Ей от Господа. И рече Мариам: величит душа моя Господа, и возрадовася дух мой о Бозе Спасе моем. Яко призре на смирение рабы Своея: се бо от ныне ублажат Мя вси роди. Яко сотвори Мне величие Сильный, и Свято имя Его. Пребысть же Мариам с Нею яко три месяцы и возвратися в дом Свой.»

Хор: (по окончании чтения Евангелия) Слава Тебе, Боже наш, слава Тебе.

Запев: Пресвятая Богородице, спаси нас.

Припев: Пресвятая Богородице, спаси нас.

Запев: Слава Отцу и Сыну и Святому Духу.

Припев: И ныне и присно и во веки веков. Аминь. (Все трижды)

Кондак, глас 8

Хор: Аще и в море ввержена бысть святая икона Твоя, Богородице, от вдовицы не могущия спасти сию от врагов, но явилася есть хранительница Афона и вратарница обители Иверския, враги устрашающая и в православной Российстей стране чтущия Тя от всех бед и напастей избавляющая.

Сугубая ектения

Диакон: Помилуй нас, Боже, по велицей милости Твоей, молим Ти ся, услыши и помилуй.

Хор: Господи, помилуй. (Трижды)

Диакон:  Еще молимся о Святейшем Патриархе Кирилле, и о Господине нашем Высокопреосвященнейшем архиепископе Льве и о всей во Христе братии нашей.

Хор: Господи, помилуй. (Трижды)

Диакон: Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Хор: Господи, помилуй. (Трижды)

Диакон: Еще молимся о милости, жизни, мире, здравии, спасении, посещении, прощении и оставлении грехов рабов Божиих, (Братский синодик) братии святыя обители сея.

Хор: Господи, помилуй. (Трижды)

Диакон: Еще молимся за всю братию и за вся православные христианы.

Хор: Господи, помилуй. (Трижды)

Свящ: Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших и помилуй ны. Милостив бо и человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.

Диакон: Ко Пресвятей Владычицы нашей Богородице и Приснодеве Марии со умилением сердец наших помолимся.

Хор: Пресвятая Богородице спаси нас.

И читаем приклонше колена молитву ко Пресвятей Богородице и Приснодеве Марии перед чудотворным Ея образом «Иверския»:

О Пресвятая Дево, Мати Господа, Царице Небесе и земли! Вонми многоболезненному воздыханию душ наших призри с высоты святыя Твоея на нас, с верою и любовию поклоняющихся пречистому образу Твоему. Се бо, грехми погружаемии и скорбьми обуреваемии, взирающе на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о, Мати, всех скорбящих и обремененных! Помози нам, немощным, утоли скорбь нашу, настави на путь правый нас, заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину и на Страшнем Суде Сына Твоего явися нам милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу.

Хор: Аминь.

Диакон: Премудрость.

Свящ: Пресвятая Богородице спаси нас.

Хор: Честнейшую Херувим, и Славнейшую, без сравнения, Серафим, без истления Бога Слова Рождшую, сущую Богородицу Тя величаем.

Свящ: Слава Тебе Христе Боже, Упование наше слава Тебе.

Хор: Слава Отцу и Сыну и Святому Духу, ныне и присно и во веки веков. Аминь.

Господи, помилуй. (Трижды.) Владыка, благослови.

И отпуст:

Свящ: Христос истинный Бог наш, молитвами Пречистыя Своея Матери, преподобных и богоносных отец наших и всех святых помилует и спасет нас яко благ и человеколюбец

Хор: Аминь.

Братия подходит чинно к иконе Божией Матери, и затем к наместнику за благословением на предстоящий день.

Хор: От святыя иконы Твоея, о Владычице Богородице, исцеления и цельбы подаются обильно с верою и любовию приходящим к ней: тако и мою немощь посети, и душу мою помилуй, Благая, и тело исцели благодатию Твоею, Пречистая.

Хор: Величаем Тя, / Величаем Тя, / Пресвятая Дево / Богоизбранная Отроковице / и чтим образ Твой святый, / имже точиши исцеления / всем с верою притекающим.